१. राम्रो उत्पादन लिन सकिन्छ (High yield) ः
नेपालमा करिव ७-८ वर्षका बोटहरुले ५० देखि ७० किलोग्राम सम्म उत्पादन दिएको पाईएको छ । अझ राम्ररी खेती व्यवस्थापन गर्न सकिएमा उत्पादन बढ्न सक्ने अनुमान गर्न सकिन्छ । यो फल प्रत्येक वर्ष फल्दछ ।
२. उत्पादन प्रविधि सजिलो छ (Easy Production Technology) :
यो फलको खेती प्रविधि त्यति जटिल छैन, सजिलैसँग कृषकले अपनाउन सक्दछन् । यो फलको खेती गर्दा पहिलो वर्ष खाल्टो खन्न, बिरुवा खरिद गर्न र सपोर्ट व्यवस्थापन गर्नुपर्ने भएकोले लगानी वढी लाग्दछ । बगान स्थापना गरिसके पछि दुई पटक काँटछाँट र मलजल दिने त्यसपछि वर्षमा दुई चार पटक गोडमेल अनि गर्मियाममा सिंचाई गर्ने गरे पुग्छ । वर्षैभरि खटिरहनु पर्ने झन्झट पर्दैन ।
३. वजारमुखी तथा निर्यातमुखि छ (Market Oriented Exportable Fruit) :
हाल नेपालमा यसको बजार प्रमुख रुपमा सुपरमार्केटमा हुने गरेको छ । काठमाण्डौको सुपरमार्केटमा निकै महँगोमा सिजन अनुसार रू.४०० देखि ८०० प्रति किलोमा विक्री भैरहेको छ । हाल शहर बजारमा यसको महत्व बुझेका उपभोक्ताहरु मात्र यसका ग्राहक हुन भने भविष्यमा यसको उपभोक्ताहरु बढ्न जाने देखिन्छ । अझ गुणस्तरीय फल उत्पादन गर्न सकिएमा भारत, बंगलादेश र अन्य मुलुकहरुमा पनि निकासी गर्न सकिने सम्भावना पनि छ । किनकी भारतले वर्षेनी धेरै फल आयात गर्दै आएको छ उक्त मुलुकमा जनसंख्याको आधारमा खेती गर्न सकिने क्षेत्र अत्यन्त न्यून छ भने बंगलादेशमा यसको खेती हुदैन ।
४. बढी आम्दानी लिन सकिने (High income) :
यो फल जमिनको आकार हेरेर प्रति रोपनी जमिनमा १५ देखि २० वोट अटाउछ र १० देखि १५ वटा मात्र बोटमा फल लागेको हिसावले प्रतिवोट ५० के.जि फलेमा प्रतिरोपनी ५०० देखि ७५० केजि फल फल्दछ र न्यूनतम रु १०० प्रतिकेजि विक्री गरेमा पनि प्रतिरोपनी प्रतिवर्ष रु ५०,००० देखि ७५,००० आम्दानी लिन सकिन्छ ।
५. लामो समय सम्म भण्डारण क्षमता (Storability for Long Duration) :
किवीफल वोटमा छिप्पिए पछि टिपिन्छ र संरक्षण गरिन्छ । टिप्दा, ओसारपसार, भण्डारण प्यकिङ्ग गर्दा चोटपटक नलगाई सुरक्षित गरेमा लामो समय सम्म भण्डारण गरेर राख्न सकिन्छ। यो फल कार्तिक मंसिर महिनामा टिप्ने भएकोले ६ देखि ८ हप्ता खुल्ला ठाउँमा नै भण्डारण गर्न सकिन्छ। यदि कोल्ड स्टोरमा 0 डिग्री सेल्सीयसमा राख्न सकियो भने ६ देखि ८ महिनासम्म राख्न सकिन्छ। यसरी करिव ८ दखि १० महिना सम्म किवीफलको व्यवस्थापन मिलाउने सम्भावना देखिन्छ ।
६. रोजगारीको अवसर बढाउँछ (Promote employment opportunity) :
संसारको किवीखेती हुने देशहरुमा यसको व्यवशायीक खेती तिव्र रुपमा बढेको छ । धेरै आम्दानी हुने, पोषिलो, अन्यपरिकारहरु किवी जुुस, किवी वाईन, जाम वनाउन सकिने हुँदा विभिन्न उद्यमशिलता बढाउँछ । अझ छाला स्वस्थ राख्ने शौन्दर्य सामाग्रीहरु जस्तै क्रिम, लोसन आदिमा पनि किवीफलको प्रयोग बढ्दै गएको छ, किनकी छाला स्वस्थ राख्न आवश्यक पर्ने भिटामिन सि यो फलमा राम्रै मात्रामा पाईन्छ ।
७. राष्ट्रिय अर्थतन्त्रमा ठुलो टेवा दिन्छ (Direct impact on National Economy) :
नेपालको हाल सुन्तला खेती भैरहेको क्षेत्र भन्दा माथी र स्याउ खेती हुने मुस्ताङ्ग तथा कर्णाली क्षेत्र भन्दा तलको भूभागको अथवा १००० मिटर देखि २५०० मिटरसम्मको उच्च पहाडी भू–भागमा यस फलको खेती गरी ठुलो परिमाणमा उत्पादन गर्न सकिन्छ र कृषकहरुले आयस्तर वृद्धि गर्न सक्दछन् । हाल नेपालको फलफूल उत्पादनमा सुन्तला र स्याउ खेतिले भन्दा बढी योगदान दिन सक्ने सम्भाव्यता रहेको छ । जसले गर्दा राष्ट्रिय अर्थतन्त्रमा ठोस टेवा पुग्न सक्ने देखिन्छ ।
८. जलवायु परिवर्तनको असर कम हुने (Less effect of climate change) :
किवीफल खेतीको लागि आवश्यक हावापानीको फराकिलो पन अन्य बाली भन्दा बढी छ, जस्तै नेपालको सन्दर्भमा पनि करिव १२०० देखि २४०० मिटरको उचाईको भू–भागमा यसको खेती सफलतापूर्वक गर्न सकिन्छ । आवश्यक चिलिंग घण्टाको नै लेखाजोखा गर्दा पनि यस फलको चिलिङ्ग अवधि दुईतीन गुनाको फरक छ । जसले गर्दा जलवायुको परिवर्तनलाई अन्य बालीको तुलनामा यो फलले सहज रुपमा सहन सक्ने अवस्था छ ।
